1 Corinthians 9
Polo'a muki kava'amo hisuva himamu'nimo hane'niya'monanafa nosuvanagi nakame hiyo, huno hu'niya gemae
1Nagaemo apa vekamo mai'nove. Kalavusifi'mo o'mai'ne'na muki kava'amo afa'a hisuva kava'mo hane'niye. Nagaemo Ala kava netimo Yesu'mo naulagafati'mo ago age'nove. Ala kava neteti'mo ali'ya'mo ali'nogetapae'mo lapakaemo alagamo aegekana hutapa ae'nae. 2Mago vaya'mogimo nagaefe'mo, apa vekamo o'mai'niye, hu'a nehaya'monanafa ali'ya'nileti'mo Goti mafa'ne'amo ago hamale'naya'mofe'mo Goti apa veka'amo mai'niye hutapa afa'a hugae. Lapakaetegamo u'na apa ali'ya'nimo ali'nogetapae'mo Goti mafa'ne'amo hamale'nage'a mago vaya'mogi lapake'nayanage'a Polo apa ali'ya'amo mai'nae, hu'a hugae. 3Nagenoka hu'a nafi neke'apae'mo maku make hu'a ne'nataya vaya'aife'mo ge hu'na naha mae'na hisuvafe'mo ali'ya'mo ali'noge'apae'mo Kolitiyani vaya'mogi Goti mafa'ne'amo hamale'nae, hu'na nehuve. 4Goti ali'ya'amo ne'aluva'mofe'mo ali'ya'nileti'mo ne'ya'e ani'e'mo lapakaemo fiku namisage'na alisuva himamu'nimo ohane'nifiye. 5Mago Goti apa vaya'amogimogi Ala kava ne'mo agufale agana'amogimogi Pitamogi hu'a Kalisitini hamale'naya a'ne'apimo apavaleli'a ne'vae. Ani kava'mo hisuva himamu'nimo ohane'nifiye. 6Nagae'e Manamasi'e'mo la'agaiti'age'mo ne'ya'mo nesu'a ali'ya aliteta'a afa'a o'atalesu'afiye. 7Haiya ati vaya'mogimo kame nehu'apae'mo apakai'apimo ne'ya'apimo kahauya hu'a ali'a ne'nae. Haiya vaya'mogimo hoya ne'vai'apae'mo hoya'apifati'mo ne'ya'mo ali'a no'nae. Haiya vaya'mogimo pulumaka afule'mo yagai'a mai'ne'apae'mo nu'anu'amo no'nae.8Ma mopafi kavafe'mo ae'na kalafefa gemo nehuva'monanafa Goti ke'aepa ge'amo'mo mani kavafe'mo magoke agufa gemo hu'niye. 9Mosese'a avo'mo kae male'niya ke'aepa gemo'mo huno'ae'mo,pulumakamogi apaiyaleti'mo mago ne'ya'mo haleti'ya'amo ae'a nehale'apae'mo o'nesayafe'mo apavayale'mo nofi kitapa o'apateyo, huno hu'niye. Goti'a pulumaka'aeke'mo agesamo afino hu male'nifi lagae'efe'mo hu'niye. He lagae'efe'mo mani gemo hu'niye. Ai'yu ne'aiya vaya'e hoyafati'mo ne'ya'mo ne'aliya vaya'mogi'e'mo ali'ya'mo ne'ali'apae'mo, mago ne'ya'mo afole aisigeta aligune, hu'a nehu'a agava mai'ne'a apavayagunagu hisayafe'mo avo kae male'niye. 11Auneme'e avina ya'mo lapakaetegamo ago hakale male'none. Hakale male'nona hoyafati'mo lagufale ya'mo alisunana kanale osugifiye. 12Mago mono vaya'mogimo lapakaetegati'mo apakufale ya'mo alisaya himamu'apimo hane'nisiyana lagae'e'mo alisuna himamutimo mago'e huno hane'niye. Fiku alisuna himamutimo hane'niya'monanafa afa'a o'ali'none. Lapakaetegati'mo amega lagufale ya'mo o'alita Kalaisife'mo alagepa faigoko ge'amo lapakaemo afisaya ka'mo o'akanisunafe'mo muki agufa agafa kana ya'mo ali'none. 13Yu vaya'ai alopa mono nopi'mo ali'ya'mo ne'ali'apae'mo mono nopati'mo ne'ya'apimo ne'aliye, hutapa o'afi'nafiye. Ofalinimo ne'malaya hi'yalamute'mo ali'ya'mo ne'aliya vaya'mogimo hi'yalamuteti'mo ame'amo ali'a ne'nae, hutapa o'afi'nafiye. 14Ani kavatefe'mo Ala kava ne'mo'a, Alagepa faigoko ge'nimo ae'a hakalo hu'a hapa nepaiya vaya'mogi ali'ya'mo ne'aliya'mofe'mo apakufale ya'mo fiku aliyo, huno hu'niye.
15Hu'niya'monanafa muki ya'mo alisuvafe'mo himamu'nileti'mo afa'a o'ali'nove. Hemenimo lapakaepati'mo mago ya'mo fiku alisuvafe'mo mani avo'mo nokaove. Ali'ya'nileti'mo nagufale ya'mo fiku alisuvafe'mo o'nahau'niyanage'na hogote'na falite'naeke'mae. Ali'ya'nileti'mo nagufale ya'mo no'aluva'mofe'mo amuse nehuve. Fiku yanageno mago vekamo'a amuse nehuva ge'nimo aeno ati kaegaiye. 16Alagepa faigoko ge'amo ae'na hakalo hu'na hapa nepauva'mofe'mo amuse hisuva kava'mo afa'a ohane'niye. Alagepa faigoko ge'amo ae'na hakalo hu'na hapa paisuvafe'mo Goti'a kalavusi huno nate'niya'mofe'mo alu kateti'mo afa'a fai'na kasalo pae'na visuva ka'mo alagi ohane'niye. Vaehae, hu'na, alagepa faigoko ge'amo ae'na hakalo hu'na hapa opaisuvana nagaetegamo hosu kava'mo afole aisige'na alagepa hu'na o'maiguve. 17Ae'na hakalo hu'na hapa paisuvafe'mo nagai'nimo lekana pai'na nate'novesinana miya'nimo namiyo, hu'na afa'a huvesina'monanafa kalavusifi'mo mai'ne'na ali'ya'ale'mo alino nate'niye. 18Inagi miya'nimo na agufa ya'mo hane'niye. Miya'nimo no'aluva'monanafa ali'ya'nileti'mo alisuva himamu'nilefe'mo nagufale ya'mo o'ali'na alagepa faigoko ge'amo fiku afa'a ae'na hakalo hu'na hapa nepauva kavake'mo miya'nimo hane'niye.
19Nagaemo mago vaya'ai ali'yate'mo o'mai'nofa afa vekamo mai'nova'monanafa asole vaya'mo Gotitegamo apavaleli'na esuvafe'mo muki vaya'ai ali'ya'apimo ne'aluva vekamo mai'nove. 20Yu vaya'mo apavaleli'na esuvafe'mo Yu vaya'mogimo nehaya kava nehu'na Yu vekagana hu'na mai'nove. Nagaemo ke'aepa gemo afe'alumelagamo ne'maiya vaya'mo apavaleli'na esuvafe'mo ke'aepa gemo afe'alumelagamo ne'maiya vaya'aitegamo u'na ali'ya'mo ne'ali'nae'mo ke'aepa gemo afe'alumelagamo o'mai'nova'monanafa ke'aepa gemo afe'alumelaga vekagana hu'na mai'nove. 21Ke'aepa gemo o'ali'naya vaya'mo apavaleli'na esuvafe'mo Yu nofi vayapati o'mai'naya vaya'aitegamo u'na ali'ya'mo ne'ali'nae'mo ke'aepa gemo o'ali'niya vekagana hu'na mai'nove. Goti ke'aepa ge'amo amagi'na atalete'na afa'a mai'nove, hu'na nosufa Kalaisi ke'aepa ge'amo afe'alumelagamo mai'nove. 22Mai'ne'na apavaleli'na esuvafe'mo alagepa hu'a o'afi'naya Goti mafa'ne'aitegamo u'na ali'ya'mo ne'ali'nae'mo apakaekana hu'na mai'nove. Alu kava alu kavateti'mo mago'e vaya'mo apavaleli'na esuvafe'mo alu kava alu kava'mo nehaya vaya'aitegamo u'na ali'ya'mo ne'ali'nae'mo alu kava alu kava'mo nehuve. 23Alagepa faigoko ge'amo aino atagu faesiyafe'mo mani kava'mo nehuve. Alagepa faigoko ge'aleti'mo fiku naha maeno namisiya ya'mo muki vaya'e'mo magokepi alisunafe'mo ani kava hu'na mai'nove.
24Asole vaya'mogimo nagu nagu hu'a yokalomo nelaya'monanafa magoke vekamo'a aeno apakaseteno male'naya ya'mo ne'aliye. Ani kava hutapa aeta agasetapa hetamatapimo alisayafe'mo nagu nagu hiyo. 25Muki alu yokalo alu yokalo'amo nelaya vaya'mogimo ae'a apakasesayafe'mo alu kava alu kava'mo nehu'a apakufale'mo yagai'a ne'apatae. Apakaemo kasalisiya ya'mo alisayafe'mo ani agufa kava'mo nehaya'monanafa lagaemo okasalino hanege hanege huno hanesiya hetamatimo alisunafe'mo laya mukiki nehune. 26Nehuna'mofe'mo nagaemo fiku nagu nagu nosufa magoke api kate'mo aulu he'na age'ne'na nagu nagu hu'na ne'uve. Nayateti'mo siki kavetamo nehu'nae'mo yasimo ne'amagufiye. 27Ha'ao, nagufamo amagi'na ali'na kanale hu'na atete'na yagai'na ne'atove. Fiku yanage'na vaya'aife'mo alagepa faigoko gemo ae'na hakalo hu'na hapa pai'novanageno alino apaheno natalesige'na hetama'nimo o'aliguve.
Copyright information for
KYG